རྒྱ་གར་དང་ཨུ་རུ་སུའི་ལོ་འཁོར་ཚོགས་ཆེན་ཐེངས་ ༢༠ པ་དེ་བཞིན་རྒྱལ་སྤྱིའི་གོ་རིམ་ལ་འགྱུར་བ་འགྲོ་བཞིན་པའི་ཁྲོད་འདིར་ལོ་རྒྱུས་རང་བཞིན་གྱི་ཐབས་བྱུས་ཟླ་གྲོགས་འདི་ལ་ཚོད་འགམ་བྱེད་ས་ཞིག་ཆགས་ཡོད།
རྒྱ་གར་གྱི་སྲིད་བློན་ན་རེནྡྲ་མོ་དྷི་མཆོག་ཝ་ལ་ཌི་ཝོ་སི་ཊོག་ཏུ་ཤར་ཕྱོགས་དཔལ་འབྱོར་ཚོགས་ཆེན་དུ་ཉིན་གྲངས་གཉིས་རིང་ཕྱོགས་གནང་བཞིན་པ་དང་ཨུ་རུ་སུའི་སྲིད་འཛིན་པུ་ཊིན་དང་ལྷན་དུ་ལོ་འཁོར་ཚོགས་ཆེན་ཀྱང་ཚུགས་ཡོད་པ་རེད།
དཔལ་འབྱོར་ཚོགས་ཆེན་སྐབས་རྒྱ་གར་གྱི་དཔལ་འབྱོར་འབྲེལ་ལམ་ནང་རྒྱུན་མཐུད་མཐོང་ཐུབ་པའི་ཤར་ཕྱོགས་ལག་བསྟར་སྲིད་བྱས་གསལ་འདོན་བྱས་ཡོད། སྲིད་བློན་མཆོག་གིས་ཐོན་ཁུངས་ལེགས་པའི་མངའ་ཁུལ་དེའི་འཕེལ་རྒྱས་ཆེད་ཨ་སྒོར་ཐེར་འབུམ་ ༡ གི་བུ་ལོན་གཡར་རྒྱུ་གསལ་བསྒྲགས་གནང་ཡོད། སྲིད་བྱུས་འདིའི་ཐོག་ནས་དྷི་ལི་གསར་པས་མངའ་ཁུལ་དེ་དང་ལྷན་དུ་མཉམ་ལས་དང་མ་འཇོག་བྱ་རྒྱུར་ཕན་ཐོགས་ཐུབ་རྒྱུ་རེད། རྒྱ་གར་གྱི་ཕ་ལམ་དང་། རྡོ་སོལ། གསེར་སྔོག་འདོན་བཅས་ཀྱི་ནང་མ་འཇོག་བྱེད་བཞིན་ཡོད།
རྒྱལ་ཁབ་གཉིས་དབར་གྱི་འབྲེལ་ལམ་དེ་བཞིན་མཉམ་ལས་ཀྱི་ཁྱབ་ཁོངས་ཇི་ཡོད་ཚང་མར་ཁྱབ་པའི་ཐོག་ཐུན་མོང་ལ་ཕན་ཐོགས་པའི་རང་བཞིན་གྱི་ཆ་ནས་དམིགས་བསལ་ཞིག་ཆགས་ཡོད། དེའི་ཁར། དཔལ་འབྱོར་དང་འཕེལ་རྒྱས་ཀྱི་གནད་དོན་དང་འབྲེལ་བའི་དཔལ་ཡོན་གྱི་རིན་ཐང་འདྲ་མཚུངས་དང་། དུས་ཚོད་ཀྱིས་ཚོད་འགམ་བྱས་པའི་ཟླ་གྲོགས། ཐུན་མོང་གི་བསམ་ཤེས། ཡིད་ཆེས། ཐུན་མོང་གི་ཁེ་ཕན་བཅས་ཀྱི་ཐོག་ནས་རྒྱ་གར་དང་ཨུ་རུ་སུ་གཉིས་མངའ་ཁུལ་དང་རྒྱལ་སྤྱི་གཉིས་ཀའི་ཆ་ནས་འབྲེལ་ཐག་ཉེ་པོར་སླེབས་ཐུབ་ཡོད། དབུ་ཁྲིད་རྣམ་གཉིས་དབར་བགྲོ་གླེང་གནང་སྐབས་ཀྱི་དོ་སྣང་བྱེད་ས་གཙོ་བོ་ཞིག་ནི་ཤང་གའི་མཉམ་ལས་ཚོགས་པ་ཆགས་ཡོད།
ལོ་འཁོར་ཚོགས་ཆེན་སྐབས་དྷི་ལི་གསར་པས་རྒྱ་གར་གྱི་ནང་ཁུལ་གནས་ཚུལ་དང་འབྲེལ་ནས་ཁྱིམ་མཚེས་རྒྱལ་ཁབ་ཁག་གཅིག་ལ་ཕོག་དུག་བཏང་བ་ཚུད་པའི་རྒྱལ་ཁབ་གཉིས་་ལ་དཀའ་ངལ་མང་དག་ཅིག་འཕྲད་བཞིན་པའི་སྐབས་འདིར་དབུ་ཁྲིད་རྣམ་གཉིས་ནས་རྒྱལ་ཁབ་ཀྱི་སྣེ་ཁྲིད་རྣམ་པ་ལེགས་ཤོས་ཁག་གཅིག་གསལ་འདོན་གནང་ཡོད། ཨུ་རུ་སུས་མཉམ་སྦྲེལ་རྒྱལ་ཚོགས་བདེ་སྲུང་ལྷན་ཚོགས་ནས་རྩིས་ཏེ་རྒྱ་གར་ལ་རྒྱབ་སྐྱོར་བྱེད་ཀྱི་ཡོད་པ་གསལ་པོ་ཡིན་ཏེ་ཨུ་རུ་སུས་རྩ་ཁྲིམས་དོན་ཚན་ ༣༧༠ པ་མེད་པ་བཟོས་པ་དེ་རྒྱ་གར་གྱི་ནང་གནས་ཞིག་རེད་ཅེས་གཤད་ཡོད་པས་སོ།
ལོ་འཁོར་ཚོགས་ཆེན་ཐེངས་ ༢༠ པའི་ཐོག་དབུ་ཁྲིད་རྣམ་གཉིས་ནས་ཚོང་ལས་དང་། རྒྱལ་སྲུང་། མཁའ་དབྱིངས། ནུས་ཤུགས། རྒྱ་མཚོའི་འདབས་འབྲེལ་གྱི་འབྲེལ་མཐུད་ལྟ་བུའི་ཁྱབ་ཁོངས་ཁག་གི་ནང་ཕྱོགས་གཉིས་ཀྱི་མཉམ་ལས་བྱེད་ས་གསར་པ་བཙལ་རྒྱུར་དོ་སྣང་གནང་ཡོད།
དཔལ་འབྱོར་གྱི་ཐོག་ནས་སྲིད་འཛིན་པུ་ཊིན་གྱིས་སྤྱི་ལོ་ ༢༠༡༨ ལོར་ལོ་འཁོར་ཚོང་འབྲེལ་ཚད་གཞི་ཨ་སྒོར་ཐེར་འབུམ་ ༡༡ ཟིན་པའི་ཐོག་ནས་བརྒྱ་ཆ་ ༡༧ འཕར་ཆ་བྱུང་བ་དེ་འདོད་བློ་ཁེངས་པ་ཞིག་བྱུང་ཚུལ་གསུངས་ཡོད། དབུ་ཁྲིད་རྣམ་གཉིས་ནས་དཔལ་འབྱོར་དང་ཚོང་ལས་འབྲེལ་ལམ་ནང་མུ་མཐུད་འཕེལ་རྒྱས་གཏོང་བའི་རྨང་གཞི་སྟེ་དཔལ་འབྱོར་དང་ཚོང་ལས་མཉམ་ལས་དེ་ཕྱོགས་མང་དང་སྲ་བརྟན་ཞིག་དགོས་པའི་ནན་བརྗོད་གནང་ཡོད། ཨུ་རུ་སུས་རྒྱ་གར་ནང་བཟོས་ཞེས་པའི་ལས་གཞིའི་ནང་མཉམ་བཞུགས་རྒྱ་བསྐྱེད་བྱ་འདོད་ཡོད་མེད་དང་རྒྱ་གར་གྱིས་ཨུ་རུ་སུའི་ལས་འཆར་ཁག་གི་ནང་མ་འཇོག་བྱ་འདོད་ཡོད་མེད་བཅས་ཀྱི་ཐོག་ལ་བགྲོ་གླེང་གནང་ཡོད།
ནུས་ཤུགས་ཁྱབ་ཁོངས་ཀྱི་ཆ་ནས་བཤད་ན། ད་ཡོད་ཀྱི་ནུས་ཤུགས་གྲོས་མཐུན་ལ་བསྔགས་བརྗོད་བྱེད་པའི་ཐོག་ནས་རྒྱ་གར་དང་ཨུ་རུ་སུས་རྒྱ་གར་དང་ཨུ་རུ་སུའི་ནང་སྣུམ་དང་རླང་སྣུམ་གྱི་ཁྱབ་ཁོངས་མཉམ་འདུས་འཕེལ་རྒྱས་དང་ས་བབ་འཚོལ་བསྙེགས་ནང་མཉམ་ལས་མདུན་བསྐྱོད་བྱ་རྒྱུའི་ཐག་གཅོད་བྱས་ཡོད། ཁོང་རྣམས་ནས་ཨར་ཊིག་གི་མཚོ་ལམ་རྒྱུད་ནས་ཨུ་རུ་སུ་ནས་རྒྱ་གར་ནང་སྣུམ་མཁོ་གཏོང་རྒྱུན་གནས་ཐུབ་པ་བྱ་རྒྱུའི་མོས་མཐུན་གནང་ཡོད། རྒྱ་གར་གྱིས་ཨུ་རུ་སུ་དང་ལྷན་དུ་ཨར་ཊིག་ནང་མཉམ་ལས་བྱ་རྒྱུའི་འདུན་པ་འཆང་གི་ཡོད། ཕྱོགས་གཉིས་ནས་སྤྱི་ལོ་ ༢༠༡༩ ནས་ ༢༠༢༤ ལོའི་ཆེད་ཀྱི་ཧའི་ཌྲོ་ཀར་བོན་ནང་མཉམ་ལས་བྱ་རྒྱུའི་འཆར་གཞི་ཞིག་ལ་མིང་རྟགས་བཀོད་ཡོད། འབྱུང་འགྱུར་ལོ་ལྔའི་ནང་ནུས་ཤུགས་ཁྱབ་ཁོངས་དེ་མཐོ་ཚད་གསར་པ་ཞིག་ལ་སླེབས་རྒྱུའི་རེ་བ་ཡོད་པ་རེད། ཉིང་རྡུལ་ཁྱབ་ཁོངས་ཀྱི་ནང་འབྱུང་འགྱུར་ལོ་ ༢༠ ནང་ཨུ་རུ་སུའི་འཆར་འགོད་ཅན་གྱི་གློག་ཤུགས་སྡེ་ཚན་ ༡༢ འཛུགས་བསྐྲུན་འཕར་མ་བྱ་རྒྱུ་ཡིན་པ་རེད།
རྒྱལ་སྤྱིའི་ལྷོ་བྱ་སྐྱེལ་འདྲེན་རྒྱུད་ལམ་གྱི་སྐོར་ལའང་བགྲོ་གླེང་གནང་ཡོད། ཅེན་ནའི་དང་ཝ་ལ་ཌི་ཝོ་སི་ཊོག་དབར་ལ་འབྲེལ་མཐུད་རྒྱུད་ལམ་གསར་པ་ཞིག་ཕྱེ་རྒྱུ་བྱས་ཡོད་པ་དང་རྒྱུད་ལམ་དེས་དཔལ་འབྱོར་དང་ཚོང་ལས་མ་འཇོག་ལ་ཕན་ཐོག་ཆེན་པོ་ཐུབ་རྒྱུ་ཡིན་པ་རེད།
རྒྱལ་སྲུང་ཁྱབ་ཁོངས་ནང་མདུན་བསྐྱོད་ཆེན་པོ་བྱུང་བ་ཞིག་ནི་ཚན་རྩལ་གནས་སྤོ་དང་མཉམ་འདུས་ལས་འཆར་གྱི་འོག་རྒྱ་གར་གྱིས་ཨུ་རུ་སུའི་དྲག་དམག་གི་ཡོ་ཆས་ཀྱི་ཆ་ཤས་རྣམས་བཟོ་བསྐྲུན་བྱེད་འགོ་འཛུགས་རྒྱུ་རེད། མ་ཟད་གཅིག་ལན་གཅིག་འཇལ་གྱི་དམག་འགུལ་ཐབས་བྱས་རྒྱབ་སྐྱོར་ནང་མཉམ་ལས་ཆེད་སྒྲོམ་གཞི་ཞིག་གྲ་སྒྲིག་བྱ་རྒྱུའི་མོས་མཐུན་གནང་ཡོད།
མཁའ་དབྱིངས་ཀྱི་ཐད་ནས། རྒྱ་གར་གྱི་གྷ་གྷན་ཡན་མི་བསྐྱོད་ལས་འཆར་གྱི་རྒྱ་གར་མཁའ་དཔྱད་མཁས་པ་རྣམས་ཨུ་རུ་སུར་སྦྱོང་བརྡར་སྤྲད་རྒྱུའི་གསལ་བསྒྲགས་བྱས་ཡོད།
རིག་གཞུང་དང་མིའི་འབྲེལ་ལམ་གྱི་ཐད་ནས། ཨུ་རུ་སུར་བདག་ཉིད་ཆེན་པོ་གྷན་དྷིའི་འཁྲུངས་སྐར་ཐེངས་ ༡༥༠ པའི་རྟེན་འབྲེལ་ཆེད་དྲན་རྟེན་གྱི་སྦྲགས་རྟགས་ཞིག་གསར་དུ་བཏོན་ཡོད།
ཕྱོགས་ཡོངས་ནས་ཤར་ཕྱོགས་དཔལ་འབྱོར་ཚོགས་ཆེན་ཐེངས་ ༥ པ་དང་ལོ་འཁོར་ཚོགས་ཆེན་དེཌྷའི་ནང་ཤར་ཕྱོགས་ལག་བསྟར་སྲིད་བྱུས་གསར་པ་ངོ་སྤྲོད་བྱས་པ་ཚུད་པའི་ཁྱབ་ཁོངས་ཚང་མར་བདུན་བསྐྱོད་འཕར་མ་ཐུབ་པ་བཅས་ཀྱི་ཐོག་ནས་གྲུབ་འབྲས་ཆེན་པོ་ལྡན་པ་ཞིག་བྱུང་ཡོད།
མ་ཟིན། ཌག་ཌར་ཨིན་དྲ་ནི་ཏ་ལུག་ཌར། ཨུ་རུ་སུའི་ཐོག་ཐབས་བྱུས་དཔྱད་ཞིབ་པ།
